सोप (बडीसोप)

जमीन :

मध्यम ते भारी जमीन सोपीकरीता योग्य समजली जाते. मुरमाड किंवा सेंद्रिय पदार्थांचे प्रमाण अत्यल्प असणारी जमीन निवडू नये.

लागवडीची वेळ :

 ऑक्टोबर महिन्याच्या शेवटच्या आठवड्यात सोपीची लागवड करावी परंतु खारपान पट्टयातील जमिनीत ऑगस्ट महिन्याच्या पहिल्या पंधरवाड्यात लागवड केल्यास हरकत नाही असे आढळून आले.

लागवड पध्दत:

 सोपीची लागवड सरी वरंबा पध्दतीने दोन ओळीतील अंतर ६० सें.मी. आणि दोन झाडांतील अंतर ४५ सें.मी. ठेवून टोकण पध्दतीने करावी अशी शिफारस करण्यात आलेली आहे. हेक्टरी बियाणे : सोपीचे हेक्टरी ५ ते ६ किलो बियाणे पुरेसे होते.

पूर्व मशागत:

 शेतास आडवी उभी नांगरणी दिल्यावर ढेकळे फोडून वखरणी करावी. जमीन भुसभूशीत करून घ्यावी व जमिनीत ओलावा टिकून राहील याची काळजी घ्यावी.

सुधारित जाती :

 आरएफ-१०१, एनआरसीएसएसएफ-१, सीओ-१, जीएफ १

लागवड :

 सोपीची लागवड करण्या अगोदर भुसभूशीत जमिनीतील हलकी पाण्याची पाळी देवून जमीनीत ओलावा कायम राहील याची काळजी घ्यावी. लागवड करतांना बियाणे २ ते २.५ से.मी. खोल जाणार नाही याची काळजी घ्यावी नंतर लागवडीपूर्वी बियाण्यास कार्बेन्डाझिम २५ ग्रॅम प्रती किलो बियाणे वाप्रमाणे बीज प्रक्रिया करून लागवड करावी. 

आलोत व्यवस्थापन :

साधारणपणे सोपीला ४-५ पाण्याच्या पाळ्या द्याव्यात. फुलोरावस्थेत पिकास पाण्याचा ताण पडू देवू नये.

पिकाचा कालावधी : बियाणे पेरणीपासून १७०-१८० दिवसात बियाणे तयार होते.

काढणी : बाजारात विक्रीसाठी उपलब्ध असलेली सोप काढणीकरीता खालील अवस्थेप्रमाणे तोडणी करावी. म्हणजे त्या त्या अवस्थेतील सोप तयार करता येते.

• अ) लखनवी सोप : उच्छत्र (फुले) झाडांवर आल्यापासून ३५-४० दिवसानंतर म्हणजेच लागवडीपासून ९०-९५ दिवसांनी काढणी केल्यास.
• ब) जाडी सोप :  उच्छत्र (फुले) झाडांवर आल्यापासून ५०-५५ दिवसानंतर म्हणजेच लागवडीपासून १००-१०५ दिवसांनी काढणी केल्यास.
• क)सोप बियाणे : झाडावरच सोपीचे उच्छत्र (फुले) पूर्णपणे तयार झाल्यावर काढणी केल्यास, प्रत्येक प्रकारची सोपीची फुले तोडणीनंतर ७-८ दिवस सावलीत वाळवावी व नंतर थ्रेशरच्या सहाय्याने किंवा काठीने बदडून सोप वेगळी करावी.

उत्पादन : 

 सोप पिकाचे हेक्टरी

लखनवी सोप: ५-६ क्विंटल,

जाडी सोप: ९-१० क्विंटल

बियाणे सोप: १०-१२ क्विंटल उत्पादन मिळू शकते.